სააგენტომ საერთაშორისო კონსულტანტებს უმასპინძლა
დღეს საჯარო და კერძო თანამშრომლობის სააგენტოს ეწვივნენ მსხვილი გლობალური კომპანიების CMS-ის, Apricum-ისა და Ramboll-ის კონსულტანტები. შეხვედრის მიზანი იყო იმ პოტენციური შესაძლებლობების გამოვლენა, რომლებიც არსებობს საქართველოში ნარჩენების ენერგოგენერაციის ობიექტების პროექტების განხორციელების მიმართულებით. შეხვედრაში მონაწილეობა მიიღეს ასევე ფინანსთა სამინისტროსა და ეკონომიკისა და მდგრადი განვითარების სამინისტროს წარმომადგენლებმა.
კომპანია Ramboll-ის კონსულტანტმა პრეზენტაციის დროს ისაუბრა ნარჩენების ენერგოგენერაციის ობიექტების ტექნიკური მახასიათებლების შესახებ და განიხილა მსგავსი პროექტების საქართველოში განხორციელების შესაძლებლობები. CMS-ის წარმომადგენელმა ყურადღება გაამახვილა ენერგოგენერაციის ობიექტების პროექტებზე და ძირითად სამართლებრივ საკითხებზე ამ მიმართულებით. კომპანია Apricum-მა კი შეხვედრის მონაწილეებს გააცნო განახლებადი ენერგიის სფეროში საკუთარი გამოცდილება. საჯარო და კერძო თანამშრომლობის სააგენტომ ინტერესი გამოხატა ნარჩენების ენერგოგენერაციის ობიექტების მუშაობის პროცესთან დაკავშირებით. მათი პასუხების საფუძველზე გამოიკვეთა ის ნაბიჯები, რომლებიც საჯარო და კერძო თანამშრომლობის პროცესში ჩართულმა უწყებებმა უნდა გადადგან მსგავსი პროექტების იმპლემენტაციის მიზნით.
შეხვედრის ბოლოს უცხოელმა სტუმრებმა იმედი გამოთქვეს, რომ საქართველოში შეიქმნება შესაძლებლობა ნარჩენების ენერგოგენერაციის პროექტების განხორციელების მიმართულებით და ამ პროცესში ჩართვის ინტერესი და მზადყოფნა გამოხატეს.
