სააგენტოს უფროსმა ანალიტიკოსმა საჯარო და კერძო თანამშრომლობის ფორუმში მიიღო მონაწილეობა
მიმდინარე წლის 4-6 მაისს, ბარსელონაში, ესპანეთში გაიმართა საჯარო და კერძო თანამშრომლობის (PPP) რიგით მეექვსე საერთაშორისო ფორუმი, რომელსაც საჯარო და კერძო თანამშრომლობის სააგენტოს უფროსი ანალიტიკოსი – ლევან ბატიაშვილი დაესწრო. ღონისძიება მიეძღვნა საჯარო და კერძო თანამშრომლობასთან დაკავშირებულ სხვადასხვა საკითხს, მათ შორის, სფეროში არსებულ გამოწვევებსა და შესაძლებლობებს. ფორუმის დროს ყურადღება გამახვილდა ხალხზე/ადამიანზე ორიენტირებულ საჯარო და კერძო თანამშრომლობაზე როგორც გაეროს მდგრადი განვითარების მიზნების შესრულების ერთ-ერთ კატალიზატორზე.
საჯარო და კერძო თანამშრომლობის მეექვსე საერთაშორისო ფორუმის ორგანიზატორებს წარმოადგენდნენ გაეროს ევროპის ეკონომიკური კომისია (UNECE), ბარსელონის ბიზნესის სკოლა (IESE), ხოლო ღონისძიების მხარდამჭერი იყო – ბარსელონის ქალაქის საკრებულო.
ფორუმის დროს, საჯარო და კერძო თანამშრომლობის სააგენტოს უფროსმა ანალიტიკოსმა წარადგინა პრეზენტაცია და მზის ელექტროსადგურის პროექტის მაგალითის საფუძველზე, ფორუმის მონაწილეებს გააცნო საქართველო, როგორც განახლებადი ენერგიის სფეროში ინვესტიციის განხორციელების მიმზიდველი ბაზარი. მან ისაუბრა ასევე საჯარო და კერძო თანამშრომლობის ადგილობრივ თავისებურებებზე, პროცესის მარეგულირებელ კანონმდებლობაზე, განახლებადი ენერგიის პროექტების უპირატესობასა და მნიშვნელობაზე საქართველოსთვის და, ზოგადად, მსოფლიოსთვის.
აღსანიშნავია, რომ ღონისძიების მონაწილეებს შესაძლებლობა ჰქონდათ ადგილზე მოენახულებინათ ესპანეთში საჯარო და კერძო თანამშრომლობის გზით წარმატებით განხორციელებული ინფრასტრუქტურული პროექტები.