სააგენტოს უფროსი ანალიტიკოსი ენერგეტიკის რეგიონულ კონფერენციაზე სიტყვით გამოვიდა
მიმდინარე წლის 14-15 ივნისს, ენერგეტიკისა და წყალმომარაგების მარეგულირებელი კომპანიის (სემეკის) ორგანიზებით, სასტუმრო „შერატონ გრანდ თბილისი მეტეხი პალასში“ გაიმართა რეგიონული კონფერენცია თემაზე „ინვესტიციები და დავის გადაწყვეტის ალტერნატიული მექანიზმები ენერგეტიკის სექტორში“. ორდღიანი ღონისძიება დაყოფილი იყო რამდენიმე ნაწილად და მიეძღვნა ისეთ საკითხებს, როგორებიცაა: ინვესტიციების მოზიდვის ხელშეწყობა განახლებადი ენერგიის სექტორში, ენერგოუსაფრთხოება, ენერგეტიკის სფეროში მიმდინარე რეფორმების შეფასება, ენერგეტიკული პროექტების განხორციელება საქართველოში, მეზობელ ქვეყნებსა და საქართველოს შორის ელექტროენერგიით ვაჭრობის შესაძლებლობები და მექანიზმები და სხვა.
რეგიონულ კონფერენციაში მონაწილეობა მიიღო საჯარო და კერძო თანამშრომლობის სააგენტოს უფროსმა ანალიტიკოსმა – ლევან ბატიაშვილმა. სადისკუსიო პანელზე, რომელზეც ენერგეტიკული პროექტების დაფინანსების საკითხები განიხილეს, ლევან ბატიაშვილი სიტყვით გამოვიდა და ისაუბრა საჯარო და კერძო თანამშრომლობის პროექტის განხორციელების წესებზე, ენერგეტიკის სექტორში საჯარო და კერძო თანამშრომლობის პროექტის განხორციელების თავისებურებებზე, საჯარო და კერძო თანამშრომლობის პროექტების განხორციელებისათვის საჭირო მოთხოვნებსა და კრიტერიუმებზე, რომლებიც კანონმდებლობითაა გაწერილი, ასევე ენერგეტიკის სექტორში საჯარო და კერძო თანამშრომლობის პროექტებთან დაკავშირებულ მოლოდინებზე.
აღსანიშნავია, რომ საჯარო და კერძო თანამშრომლობის სააგენტო აქტიურად არის ჩართული ყველა ღონისძიებაში, რომლის მიზანია საქართველოში ენერგეტიკის სფეროში შესაძლებლობების გამოკვეთა და უკეთესი საინვესტიციო გარემოს შექმნის ხელშეწყობა.
