სააგენტოს ორგანიზებით SOURCE სისტემის პრეზენტაცია გაიმართა
დღეს, საჯარო და კერძო თანამშრომლობის სააგენტოს ორგანიზებით, „მდგრადი ინფრასტრუქტურის ფონდის“ (Sustainable Infrastructure Foundation) ჟენევაში მდებარე სათავო ოფისმა SOURCE სისტემის შესახებ მაღალი დონის ონლაინ ტრენინგი გამართა. შეხვედრას ესწრებოდნენ საჯარო და კერძო თანამშრომლობის სააგენტოს, რეგიონული განვითარებისა და ინფრასტრუქტურის სამინისტროს, ფინანსთა სამინისტროსა და ქალაქ თბილისის მუნიციპალიტეტის მერიის წარმომადგენლები, რომელთა საქმიანობაც ინფრასტრუქტურულ პროექტებზე მუშაობას მოიცავს.
პრეზენტაციის დროს, SOURCE პლატფორმის აღმასრულებელმა დირექტორმა – Christophe Dossarps-მა და უფროსმა მენეჯერმა ინტეგრაციის მიმართულებით – Cédric Van Riel-მა, შეხვედრის მონაწილეებს გააცნეს სისტემის ძირითადი ფუნქციები, მიზნები, უსაფრთხოებასთან დაკავშირებული საკითხები. გარდა ამისა, კონკრეტული ქვეყნის მაგალითზე ნაჩვენები იყო სისტემის მუშაობა პრაქტიკაში. პრეზენტაციის დასრულების შემდეგ, შეხვედრა კითხვა-პასუხის რეჟიმში გაგრძელდა.
აღსანიშნავია, რომ SOURCE არის ინფრასტრუქტურული პროექტების მომზადებისა და მართვის მსოფლიოში აღიარებული პლატფორმა, რომელიც ქმნის პროცესების ელექტრონულ სისტემაზე სრულად გადატანის შესაძლებლობას. სისტემა დაინტერესებულ მხარეებს (საჯარო სექტორი, ინვესტორები და ა.შ.) სთავაზობს მოქნილ მექანიზმს, რომელიც ამარტივებს მონაცემების შეყვანას, ანალიზსა და გაცვლას, რაც, შედეგად, ინფორმაციის ჰარმონიზაციასა და ინტეგრაციას უწყობს ხელს და პროექტების განვითარების პროცესს აუმჯობესებს.
