სააგენტომ კორეელ ინვესტორებთან შეხვედრა გამართა
დღეს, საჯარო და კერძო თანამშრომლობის სააგენტოს ეწვივნენ სამხრეთ კორეელი ინვესტორები, რომლებიც დაინტერესებული არიან საქართველოში, საჯარო და კერძო თანამშრომლობის ინსტრუმენტის გამოყენებით, ენერგეტიკისა და ინფრასტრუქტურის სფეროებში ინვესტიციის განხორციელებით. კერძოდ, პროექტი გულისხმობს საქართველოში ეკონათურების (LED) წარმოებასა და შემდგომში პროდუქციის კავკასიის რეგიონში რეალიზაციას, ასევე საქართველოში არსებული ავტობანების, სახელმწიფო და ადგილობრივი გზების განათების სისტემების შეცვლა/მომსახურებით უზრუნველყოფას.
სტუმრებს შორის იყვნენ სამხრეთ კორეული კომპანია „AIM“-ის ორი ვიცე თავმჯდომარე – მინჰო კიმი, სეონგ ბუმ პარკი, მათი ქართველი ბიზნესპარტნიორები – მოგელი ტყებუჩავა და გიორგი ტყებუჩავა, რომლებიც კომპანია „ფაზისი ენერჯის“ ხელმძღვანელობენ, ასევე ჰანანი ბენ მოშე და ოლგა ხვანი, რომლებიც ასევე პროექტის პარტნიორები არიან და კომპანია „KIG“-ს წარმოადგენენ.
საჯარო და კერძო თანამშრომლობის სააგენტოს თავმჯდომარე, ნატალია მოწონელიძე და სააგენტოს უფროსი ანალიტიკოსი – ლევან ბატიაშვილი სტუმრებს ესაუბრნენ საქართველოში არსებულ საკანონმდებლო ჩარჩოზე, ამ მიმართულებით დაგეგმილ ცვლილებებზე, საჯარო და კერძო თანამშრომლობის პროექტების განხორციელების გამოცდილებასა და, ზოგადად, საინვესტიციო გარემოს თაობაზე. სააგენტოს წარმომადგენლებმა სტუმრებს განუმარტეს საჯარო და კერძო თანამშრომლობის პროექტის ის აუცილებელი კრიტერიუმები, რომლებიც საქართველოს კანონმდებლობითაა გათვალისწინებული. კორეელ სტუმრებს ასევე გადაეცათ სახელმძღვანელო, რომელშიც თვალსაჩინოდ და გასაგებადაა გადმოცემული პროექტის განხორციელების ეტაპები/ფაზები, რომლებიც “საჯარო და კერძო თანამშრომლობის შესახებ” საქართველოს კანონითაა განსაზღვრული.
აღსანიშნავია, რომ ეკომეგობრული და მაღალეფექტური LED ტიპის ნათურების კომპანია “Hyosung & Plus Company” ერთ-ერთი მსხვილი მწარმოებელია სამხრეთ კორეაში. კომპანია ნათურებით ამარაგებს კორეის რესპუბლიკის სამთავრობო ოფისებს, ასევე დიდ სამშენებლო კომპანიებს. LED ნათურები იძლევა ენერგიის მნიშვნელოვნად დაზოგვის შესაძლებლობას და გამოიყენება შენობების, საავტომობილო გზების, ქუჩების, მოედნების და ა.შ. განათებისათვის.
