სააგენტომ ჯანდაცვის სფეროს საერთაშორისო საკონსულტაციო კომპანიასთან ონლაინშეხვედრა გამართა
2022 წლის 9 მარტს, საჯარო და კერძო თანამშრომლობის სააგენტოსა და InterHealth Canada-ს შორის ონლაინშეხვედრა გაიმართა. კომპანია დაინტერესებულია ჯანდაცვის სფეროში ინვესტირებითა და საჯარო და კერძო თანამშრომლობის პროექტების განხორციელებით საქართველოში.
შეხვედრის დროს, სააგენტოს უფროსმა ანალიტიკოსმა, ლევან ბატიაშვილმა კომპანიის წარმომადგენელს განუმარტა საქართველოში საჯარო და კერძო თანამშრომლობის პროექტის განხორციელებისათვის საჭირო პროცედურები, საკანონმდებლო ჩარჩოს თავისებურებები, ასევე ესაუბრა სააგენტოს მიერ განხილულ პროექტებზე, რომლებიც, ძირითადად, ენერგეტიკის სფეროში მიმდინარეობს. სააგენტოს რეკომენდაციით, InterHealth Canada-ს წარმომადგენელი დაუკავშირდება საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს იმ მიზნით, რომ გაარკვიოს ჯანდაცვის სფეროს საჭიროებები და ინვესტირების შესაძლებლობები, რის შემდეგაც სააგენტოსთან თანამშრომლობა გაგრძელდება.
აღსანიშნავია, რომ InterHealth Canada ჯანდაცვის სექტორის ერთ-ერთი წამყვანი კომპანიაა მსოფლიოში და ეფექტური ჯანდაცვის სისტემის უზრუნველყოფის მიმართულებით მრავალფეროვან მომსახურებას ეწევა. კომპანია ცნობილია თავისი ინოვაციური მიდგომებით და გააჩნია 25-წლიანი გამოცდილება პირველადი, მეორადი და მესამეული ჯანდაცვის სერვისების შემუშავებაში, დანერგვასა და მიწოდებაში, როგორც საზოგადოებრივ, ასევე კერძო სექტორში.