სააგენტომ EDF-ისა და Toyota Tsusho-ს წარმომადგენლებს უმასპინძლა
დღეს, საჯარო და კერძო თანამშრომლობის სააგენტოს ფრანგული კომპანია EDF-ისა და საერთაშორისო კორპორაციის Toyota Tsusho-ს წარმომადგენლები ეწვივნენ. კომპანია EDF, Toyota Trusho-სთან პარტნიორობით, დაინტერესებულია ჰიდროელექტროსადგურის ერთ-ერთ მსხვილ პროექტში ინვესტირებით.
სააგენტოს თავმჯდომარემ და უფროსმა ანალიტიკოსმა სტუმრებს გააცნეს საქართველოში საჯარო და კერძო თანამშრომლობის პროექტის განხორციელების პროცესი, საჯარო და კერძო თანამშრომლობის პროექტის კრიტერიუმები, პროექტის შემუშავებისა და განხორციელების კანონით განსაზღვრული ეტაპები, კანონით გათვალისწინებული მხარდაჭერის სქემები და ა.შ. სტუმრებმა ასევე მიიღეს ინფორმაცია საჯარო და კერძო თანამშრომლობის სააგენტოს როლსა და კომპეტენციის ფარგლებზე. სტუმრებს გადაეცათ ბროშურა, რომელშიც თვალსაჩინოდაა გადმოცემული საქართველოში საჯარო და კერძო თანამშრომლობის პროექტის განხორციელების ფაზები.
ცნობისათვის, EDF წარმოადგენს მსხვილ საერთაშორისო კომპანიას, რომლის გარკვეულ ნაწილსაც საფრანგეთის მთავრობა ფლობს. კომპანიის საქმიანობა მოიცავს ელექტროენერგიის და გაზის მიწოდებას, ელექტროსადგურის დიზაინს, მშენებლობასა და დემონტაჟს, ასევე კომპანია ახდენს ელექტროენერგიის გენერაციას სხვადასხვა წყაროდან, როგორიცაა მზე, ქარი, ჰიდრო, ბირთვული ენერგია და სხვა. 2020 წლის რეიტინგის თანახმად, შემოსავლების მიხედვით (85 მილიარდი ევრო) EDF მსოფლიოში მეორე ენერგოკომპანიად დასახელდა. რაც შეეხება კომპანია Toyota Tsusho-ს, ის არის Toyota Group-ის წევრი. კომპანიას მთელ მსოფლიოში აქვს თავისი წარმომადგენლობა და საქმიანობას ახორციელებს ბევრ სხვადასხვა დარგში, მათ შორის სამეწარმეო, კომერციული და სამომხმარებლო სფეროების მიმართულებით.
