სააგენტოს კომპანია „Racell“-ის წარმომადგენლები ეწვივნენ
2019 წლის 24 თებერვალს საჯარო და კერძო თანამშრომლობის სააგენტომ შეხვედრა გამართა დანიური კომპანია „Racell“-ის აღმასრულებელ დირექტორთან იაკოვ საფირთან და ორგანიზაციის სხვა წარმომადგენლებთან. კომპანია დაინტერესებულია საქართველოში განახლებადი ენერგიის სექტორში ინვესტიციის განხორციელებით, კერძოდ, მზის მოტივტივე ელექტროსადგურის (ე.წ. floating power plant) პროექტების მიმართულებით.
საჯარო და კერძო თანამშრომლობის სააგენტოს ხელმძღვანელის მოვალეობის შემსრულებელი ნატალია მოწონელიძე და სააგენტოს მთავარი ანალიტიკოსი ლევან ბატიაშვილი სტუმრებს ესაუბრნენ განახლებადი ენერგიის პროექტების პოტენციალის შესახებ საქართველოში, ასევე განუმარტეს საჯარო და კერძო თანამშრომლობის პროექტის განხორციელების საფეხურები, პირობები და კანონმდებლობით დადგენილი კრიტერიუმები. გარდა ამისა, შეხვედრის მასპინძლებმა დაინტერესებულ ინვესტორებს მიაწოდეს USAID-ის მიერ შემუშავებული „განახლებადი ენერგიის შესახებ ინვესტორთა გზამკვლევი“, რომელშიც თვალსაჩინოდაა გადმოცემული “საჯარო და კერძო თანამშრომლობის შესახებ” საქართველოს კანონით გაწერილი ყველა საჭირო ნაბიჯი და პროცედურა (დოკუმენტი ხელმისაწვდომია შემდეგ ბმულზე: http://vre.ge/ka).
აღსანიშნავია, რომ დანიურ კომპანია “Racell”-ს მზის პანელების წარმოების 35-წლიანი გამოცდილება გააჩნია. პანელები გამოირჩევა მაღალი ეფექტიანობით და ტექნოლოგიური ინოვაციის გამოყენების საშუალებით, სხვა მსგავს დანადგარებთან შედარებით, სამჯერ მეტი ენერგიის გენერაცია შეუძლია. კომპანია თავის საქმიანობას ახორციელებს ჩრდილოეთ და სამხრეთ ამერიკაში, აღმოსავლეთ აფრიკაში, ევროპასა და ავსტრალიაში.
